அன்பின் தேவனே. இந்த நல்ல ஜெப வேளைக்காக நன்றி கூறுகிறேன். உம்முடைய கிருபையானது இம்மட்டும் என்னையும் என் குடும்பத்தாரையும் காத்து வந்தபடியினால் உமக்கு ஸ்தோத்திரங்களைச் செலுத்துகிறேன். எனக்கு உண்டான நெருக்கத்திலும், இக்கட்டிலும் என்னைத் தயவாய்க் காத்தீர். அதனை நினைத்து உள்ளத்தின் ஆழத்திலிருந்து உம்மைத் துதிக்கிறேன். ஸ்தோத்தரிக்கிறேன். நான் வசித்துக் கொண்டிருக்கிற இடத்தில் பல பிரச்சனைகளும் போராட்டங்களும் வந்தபோது, என்னையும், என் குடும்பத்தாரையும். உம்முடைய தயவினால் காத்துக்கொண்டபடியினால் ஸ்தோத்திரம். அதிகமாக மழை பெய்து, வெள்ளம் போல சுற்றிலும் தண்ணீர் பெருகினபோது, கர்த்தாவே உமது வல்லமையினால் என் வீட்டையும், எங்களையும் வேலி அடைத்துக் காத்துக் கொண்டபடியினால் ஸ்தோத்திரம். என்னுடைய இனத்தார் ஊரில் நடைபெற்ற எல்லா விசேஷங்களுக்கும் சுக பத்திரமாய் போய் வர கிருபை செய்தபடியால் உமக்கு ஸ்தோத்திரம். என்னுடைய பொருளாதாரப் பிரச்சனையிலும், எனக்குப் போதுமானவராய் இருந்தபடியினால் உமக்கு ஸ்தோத்திரம். ஒவ்வொரு நாளும் உம்முடைய அன்பை உணரும்படி நீர் செய்த எல்லாக் காரியங்களுக்காகவும் உமக்கு ஸ்தோத்திரம்,கர்த்தாவே. எங்கள் வீட்டில் உள்ள பிள்ளைகள், தேர்விலே நல்ல மதிப்பெண் எடுக்க உதவி செய்தீரே, அதற்காக உமக்கு ஸ்தோத்திரம். மேலும் அவர்களுக்கு மேற்படிப்பு படிக்க நல்ல வழி வாசல்களைத் திறந்து கொடுத்தபடியால் உமக்கு ஸ்தோத்திரம். கர்த்தாவே, என்னுடைய பெலவீனங்களில் பெலன் தந்து, என்னைத் திடப்படுத்தி என்றும் போல என் வேலைகளைச் செய்ய உதவினபடியால் ஸ்தோத்திரம். சில பிரச்சனை நேரத்தில் என்ன செய்வது என்று ஏங்கித் தவித்த நேரத்தில் எனக்கு ஆதரவாக இருந்து என்னைத் தேற்றி வழி நடத்தினபடியால் உமக்கு ஸ்தோத்திரம். கர்த்தாவே, நான் நினையாத நேரத்தில், வேலை செய்யும் இடத்தில் என் சம்பளத்தைப் பெருகச் செய்தபடியினால் ஸ்தோத்திரம், கர்த்தாவே. இம்மட்டும் கர்த்தாவே, இந்த ஆண்டு முழுவதும் என்னுடனும், என் குடும்பத்தாருடனும் இருந்து எங்களைக் காத்து சுக பத்திரமாய் வழிநடத்தி வந்தபடியால் உமக்கு மிகுதியான ஸ்தோத்திரங்களை ஏறெடுக்கிறேன். என்னுடைய இந்த ஸ்தோத்திர ஜெபத்தினை இயேசு கிறிஸ்துவின் நாமத்தினாலே ஏறெடுக்கிறேன். நல்ல பிதாவே, ஆமென்.
