கிறிஸ்துவுக்குள் பிரியமானவர்களே,
மீட்பரும் இரட்சகருமாகிய இயேசு கிறிஸ்துவின் இனிய நாமத்தினால் வாழ்த்துகிறேன்.
தேவன் ஆதியிலே வானத்தையும் பூமியையும் சிருஷ்டித்தார். பூமியானது ஒழுங்கின்மையும் வெறுமையுமாய் இருந்தது. ஆழத்தில் இருள் இருந்தது. தேவ ஆவியானவர் ஜலத்தின்மேல் அசைவாடிக் கொண்டிருந்தார். தேவன் வெளிச்சம் உண்டாகக்கடவது என்றார். வெளிச்சம் உண்டாயிற்று. வெளிச்சம் நல்லது என்று தேவன் கண்டார். வெளிச்சத்தையும் இருளையும் வெவ்வேறாகப் பிரித்தார். வெளிச்சத்திற்குப் பகல் என்றும், இருளுக்கு இரவு என்றும் பெயரிட்டார். இவ்வாறு சகலத்தையும் தமது அநாதி தீர்மானத்தின்படி நல்லது என்று சிருஷ்டித்தார். இவையெல்லாம் சிருஷ்டித்தப்பின்பு, ஆகாயவிரிவு, நட்சத்திரங்கள், சூரியன், சந்திரன், பூமியில் வாழும் மிருகங்களையும், தண்ணீரில் உள்ள சகல ஜீவன்களையும், வானத்தில் பறக்கிற பறவைகளையும் உண்டாக்கினார். அவைகள் நல்லது என்று கண்டார். அத்துடன் பூமியின்மேல் பூண்டுகளையும், கனிதரும் மரங்களையும் சிருஷ்டித்தார். இவைகளைச் சிருஷ்டித்தப்பின்பு, இவைகளை எல்லாம் ஆளுவதற்காக தம்முடைய சாயலாக மனுஷனைச் சிருஷ்டித்தார். சாவாமையுடைய தேவன், சதாகாலமும் ஜீவிக்கிற தேவன், தமது சாயலாக மனுஷனைச் சிருஷ்டித்தார். தேவனாகிய கர்த்தர் மண்ணினாலே மனுஷனை உருவாக்கி, ஜீவசுவாசத்தை அவன் நாசியிலே ஊதினார் . மனுஷன் ஜீவாத்துமாவானான். தாம் உருவாக்கின மனிதனுக்கு ஆதாம் என்று பெயரிட்டார். இவ்வாறு உருவாக்கப்பட்ட மனிதன் தனித்திருப்பது நல்லதல்ல என்று அவனுக்கு ஏற்றத்துனையாய் இருக்க, அயர்ந்த நித்திரையை வரச்செய்து, அவன் விலா எலும்புகளில் ஒன்றை எடுத்து அந்த இடத்தைச் சதையினால் அடைத்தார். கர்த்தர், மனிதனின் விலாவிலிருந்து எடுத்த எலும்பை மனுஷியாக்கினார். ஆதாம் அவளுக்கு ஏவாள் என்று பெயரிட்டான்.
இவ்வாறு சாவாமையுடையவர், தமது சாயலாக சிருஷ்டித்த ஆதாமையும் ஏவாளையும் ஏதேன் தோட்டத்தில் கொண்டுபோய் அதைப் பண்படுத்தவும், காக்கவும் வைத்தார். அத்துடன் எச்சரிப்பாக இத்தோட்டத்தில் சகல விருட்சத்தின் கனியையும் புசிக்கவே புசிக்கலாம். ஆனாலும் நன்மை தீமை அறியத்தக்க விருட்சத்தின் கனியைப் புசிக்க வேண்டாம். நீ புசிக்கும் நாளில் சாகவே சாவாய் என்று கட்டளையிட்டார். பிசாசானவன் சர்ப்ப ரூபத்தில் ஏவாளிடம் இந்தப் பழத்தை புசிக்கும்போது, உங்கள் கண்கள் திறக்கப்படும் என்றும், நீங்கள் நன்மை தீமை அறிந்து தேவர்களைப்போல் இருப்பீர்கள் என்றும் தேவன் அறிவார் என்று தேவனுடைய வார்த்ைைதத்தான். ஏவாளின் உள்ளத்தில் விதைத்தான். ஏவாள் அந்த ஆலோசனையானது, தேவனுடைய வார்த்தைக்கு மாறானது என்று அறியாது, பழம் புசிப்புக்கு நல்லதும், பார்ப்பதற்கு இன்பமும், புத்தியைத் தெளிவிக்கிறதற்கு இச்சிக்கப்படத் தக்க விருட்சமுமாய் இருக்கிறது என்று அதைச் சாப்பிடாமலேயே உள்ளத்தில் தீர்மானம் செய்து, அதைப் பறித்து, புசித்து அதை ஆதாமுக்கும் கொடுத்தாள். அதனால் தேவனுடைய வார்த்தையை மீறி பாவம் செய்தார்கள். இந்த மீறுதலின் பாவத்தின் நிமித்தமாய், ஸ்திரீயை நோக்கி, நீ பிள்ளைபெறும்போது, உன் வேதனையைப் பெருகப் பண்ணுவேன் என்ற சாபத்தை ஏவாள் பெற்றாள். சர்ப்பமானது சபிக்கப்பட்டது. அது தன் வயிற்றினால் ஊர்ந்து போகவேண்டிய சாபமடைந்தது. ஆதாமைப் பார்த்து உன் மனைவியின் வார்த்தைக்குச் செவிகொடுத்து, புசிக்க வேண்டாம் என்று நான் உனக்கு விலக்கின விருட்சத்தின் கனியை நீ புசித்தபடியால், பூமி உன் நிமித்தம் சபிக்கப்பட்டிருக்கும். நீ உயிரோடிருக்கும் நாளெல்லாம் வருத்தத்தோடு அதன் பலனைப் புசிப்பாய். பூமி உனக்கு முள்ளும் குருக்கும் முளைப்பிக்கும். வெளியின் பயிர்வகைகளைப் புசிப்பாய். நீ மண்ணாயிருக்கிறாய், மண்ணுக்கே திரும்புவாய் என்ற மரண சாசனம் உண்டானது.
சாவாமையுடைய தேவ சாயலை இழந்து, சாவுக்கேதுவான வாழ்க்கை வாழவேண்டிய நிலை உருவானது. மரணமானது பூமியில் பிரவேசித்தது. ஆகவே மனிதன் மரண இருள் உருவான பூமியிலே வாழ வேண்டிய நிர்ப்பந்தம் நேரிட்டது. தேவன், மீண்டும் நித்திய நித்தியமாய் வாழவேண்டிய ஜீவனைப்பெற வேண்டும் என்று இவ்வுலகத்தில் வாழ்கின்ற மக்களில் அன்புகூர்ந்து, தம்முடைய ஒரேபேரான குமாரனாகிய இயேசு கிறிஸ்துவை இவ்வுலகத்திற்கு இரட்சகராக, மீட்பராக அனுப்பினார். மீட்பராகிய இயேசு கிறிஸ்துவை எவர்கள் விசுவாசிக்கிறார்களோ, அவர்கள் நித்திய ஜீவனை அடையும் மேன்மையை அவர் மூலமாய்ப் பெற்றுக்கொள்கிற சிலாக்கியம் உண்டானது. ஆகவேதான் மரண இருளின் தேசத்தில் குடியிருக்கிற வர்கள் மேல் வெளிச்சம் பிரகாசித்தது என்று தெளிவாக, திட்டமாக அறிவிக்கப்பட்டிருக்கிறது. மரண இருள் நிறைந்த பூமியிலே நாம் வெளிச்சத்தை அடைய, தாம் உண்டாக்கிய சூரியன், சந்திரன் வெளிச்சத்தைக் காட்டிலும் அதிக வெளிச்சமாகிய இயேசு கிறிஸ்துவை இவ்வுலகத்திற்கு அனுப்பினார். 2000 ஆண்டுகளுக்கு முன்பாக இயேசு கிறிஸ்து இவ்வுலகத்தில் பிறந்த செய்தி எல்லாரையும் மகிழ்விக்கக்கூடிய அன்பின் செய்தியாகும்.
இன்று கர்த்தராகிய கிறிஸ்து என்னும் இரட்சகர் உங்களுக்குத் தாவீதின் ஊரிலே பிறந்திருக்கிறார் என்று இராத்திரியிலே மந்தையைக் காத்துக்கொண்டிருந்த மேய்ப்பர்களுக்கு அறிவிக்கப்பட்டது. நல்ல மேய்ப்பராக வந்த இயேசு கிறிஸ்து, என் ஆடுகளை மேய்ப்பாயாக என்ற பெரிதான பொறுப்பை நம் எல்லோருக்கும் தரும்படியாக உலகத்தில் நல்ல மேய்ப்பராக வந்தார்.
இயேசு கிறிஸ்து மனிதனின் வாழ்வில் உண்டான எல்லாக் குறைவையும் சீர்ப்படுத்தும் அன்பின் தேவனாக வந்தார். ஏதேன் தோட்டத்தில் தேவனால் ஏற்படுத்தப்பட்ட திருமண வாழ்வில் ஆதாமும் ஏவாளும் பாவம் செய்து, தேவ மகிமையின் வெளிச்சத்தை இழந்தார்கள். தேவனுடைய வஸ்திரமாகிய ஒளியை இழந்த நிர்வாணிகளுக்கு, இரட்சிப்பின் வஸ்திரத்தை உடுத்துவிப்பதற்குத் தேவன் தம்முடைய குமாரனை இவ்வுலகிற்கு அனுப்பினார். எந்த மனுஷன் இயேசு கிறிஸ்துவை விசுவாசிக்கிறானோ அவனுக்குள் அற்புதங்கள் நடைபெற வேண்டும் என்று தேவன், தம்முடைய குமாரனாகிய இயேசு கிறிஸ்துவை மேன்மையாக்கினார்.
இன்று தேசமானது மரண இருளினால் நிறைந்ததாய் மாறியிருக்கிறது. இந்த இருளில் நடக்கிற ஜனங்கள் இயேசு கிறிஸ்துவாகிய பெரிய வெளிச்சத்தைக் காணக்கூடிய கிருபையைப் பெற்றார்கள். கிருபை நிறைந்த இயேசு கிறிஸ்து, இருளில் இருக்கிற ஜனங்களைத் தம்முடைய ஆச்சரியமான ஒளியினிடத்திற்கு அழைக்க வந்தார். அத்தோடு அவர்களை அவருடைய புண்ணியங்களை அறிவிக்கும்படி தெரிந்துகொள்ளப்பட்ட சந்ததியாயும், ராஜரீக ஆசாரியக் கூட்டமாயும், பரிசுத்த ஜாதியாயும், அவருக்குச் சொந்தமான ஜனமாகவும் மாறவும் பண்ணுகிறார். அவருடைய வெளிச்சம், இந்த உலகத்தில் நாம் சிருஷ்டிக்கப்பட்ட நோக்கத்தை அடைய நம்மைத் தகுதிப்படுத்துகிறது. மத்தேயு 5:14ல் நீங்கள் உலகத்துக்கு வெளிச்சமாயிருக்கிறீர்கள்...' என்று சொன்னவர், தம்மை ஏற்றுக்கொண்டு பின் செல்லுகிறவர்களுக்கு ஜீவ ஒளியைத் தந்து ஆசீர்வதிக்கிறவராயிருக்கிறார்.
I. ஏன் மனிதனுக்குள் இருள் வருகிறது?
1. சத்துருவினால் இருள் வருகிறது
"சத்துரு என் ஆத்துமாவைத் தொடர்ந்து, என் பிராணனைத் தரையோடே நசுக்கி, வெகுகாலத்துக்குமுன் மரித்தவர்கள்போல் என்னை இருளில் இருக்கப்பண்ணுகிறான்." சங்கீதம் 143:3
இன்று சத்துருவாகிய பிசாசானவன் யாரைத் தாக்குகிறானோ, யாருக்கு விரோதமாய் எழும்புகிறானோ அவர்களைப் பயத்தினாலும், பாடுகளினாலும், பாவத்தினாலும் நிறையச்செய்து விடுகிறான். இவ்விதமான நிலையில் இருக்கிறவர்களின் ஆத்துமா செத்ததாக இருக்கிறது. 'பாவஞ்செய்கிற ஆத்துமாவே சாகும்.' என்று எசே. 18:4ல் பார்க்கிறோம். இவ்வாறு பாவத்தில் மரித்துப் போனவர்கள், பாவத்திற்கு அடிமையானவர்கள். பாவ இருளில் நடக்கிறார்கள்.
ஒருமுறை ஒரு சகோதரன் தனக்குத் தெரிந்த குடும்பத்தாருக்காக ஜெபிக்க பிக்க என்னை சுமார் 40 திருச்சியிலிருந்து அழைத்தார்கள். கி.மீ தொலைவில் உள்ள அவர்களுடைய ஊருக்குச் சென்றேன். அவர்கள் என்னை ஒரு வீட்டிற்கு அழைத்துச் சென்றார்கள். அந்த வீட்டிலே சுகமில்லாத மகளும், தகப்பனாரும் இருக்கிறார்கள் என்று அவர்கள் இருக்கிற அறைக்கு என்னை அழைத்துச் சென்றார்கள். அந்த அறையோ இருள் நிறைந்ததாய் இருந்தது. நான் உள்ளே சென்றபோது, அந்த மகள் தகப்பனாரின் கையைக் கடித்து இரத்தம் சொட்டிக்கொண்டிருந்தது. வெகு தினங்களாக எண்ணைப்பூசி தலைவாரி அலங்கரிக்கப்படாததால், அந்த மகளின் முடி சடைசடையாய் இருந்தது. திருமணத்தன்று பிசாசினால் தாக்கப்பட்டு, தன் மாலையைப் பிய்த்துப் போட்ட அந்த மகளின் நிலமை இருள் நிறைந்த வாழ்க்கையாய் மாறி விட்டது. ஜெபத்தின் மூலம் அந்த மகளின் வாழ்க்கை மாறியது. எந்த மனிதனையும் பிரகாசிக்கச் செய்கிற அந்த மெய்யான ஒளியாகிய இயேசு கிறிஸ்து, தம்முடைய வெளிச்சத்தை அம்மகள் மீது பிரகாசிக்கச் செய்தபடியால், அந்த மகள் விடுதலைப் பெற்று வெளிச்சத்தின் பிள்ளையாய் மாறினாள்.
அருமையான சகோதரனே, சகோதரியே, அவரின் வெளிச்சம் உன் இருளை வெளிச்சமாக மாற்றக்கூடியது . இந்த பெரிய வெளிச்சமாகிய இயேசு கிறிஸ்துவை விசுவாசி, நீ ஆசீர்வதிக்கப்படுவாய்.
2. கண் கெட்டதாயிருந்தால் இருள் நிறைந்த வாழ்க்கை
"...கண் கெட்டதாயிருந்தால் உன் சரீரம் முழுவதும் இருளாயிருக்கும்."
லூக்கா 11:34
இன்று கண்களினால் பலவிதமான பாவங்களைச் செய்வதற்குரிய காரியங்கள் பெருகியிருக்கிறது. '...ஒரு ஸ்திரீயை இச்சையோடு பார்க்கிற எவனும் தன் இருதயத்தில் அவளோடு விபச்சாரஞ்செய்தாயிற்று. என்ற மத். 5:28ன்படி இச்சை நிறைந்த கண்களினால் பாவம் செய்து இருளடைகிறான். தாவீது யுத்தத்திற்குச் செல்லாது உப்பரிகையில் உலாவின அவன், ஸ்நானம் பண்ணிக்கொண்டிருந்த ஒரு பெண்ணைப் பார்த்தபடியால், அவளை அழைத்து தவறான துணிகரமான பாவத்தைச் செய்தான். அவளது கணவனையும் யுத்தத்தில் தந்திரமாய்க் கொன்று, அக்கிரமத்தைத் தன் வாழ்வில் நிறைத்துக் கொண்டபடியால், தன் சந்ததியில் ஓயாத சண்டை என்ற சாபத்தைப் பெற்றான். தாவீது தேவனுடைய இருதயத்துக்கு ஏற்றவனாக இருந்தும், அவனது கண்களின் இச்சையினால் பிறந்த குழந்தை இறந்தது.
கர்த்தர் வெறுக்கிற மேட்டிமையான கண்களையுடைய மக்கள் நிறைவாய் உண்டு. கர்த்தர் நமக்குக் கொடுத்த சுகத்தை, பெலத்தை, செல்வத்தை, தொழிலை, வியாபாரத்தை, வேலையைக் கர்த்தர் கிருபையாய்த் தந்தது என்று எண்ணாதபடி, என்னால், என்னுடைய பெலத்தால், ஞானத்தால் பெற்றிருக்கிறேன் என்று சொல்வது, நினைப்பது பெருமைக்குரியதாய் இருக்கிறது. பாபிலோன் ராஜா தன் அரமனையில் உலாவிக் கொண்டிருக்கும்போது, இது என் வல்லமையின் பராக்கிரமத்தினால், என் மகிமைப்பிரதாபத்துக்கென்று, ராஜ்யத்துக்கு அரமனையாக நான் கட்டின மகா பாபிலோன் அல்லவா என்று சொன்னான். இந்த வார்த்தை ராஜாவின் வாயில் இருக்கும்போதே, வானத்திலிருந்து ஒரு சத்தம் உண்டாகி: ராஜாவாகிய நேபுகாத்நேச்சாரே, ராஜ்யபாரம் உன்னைவிட்டு நீங்கிற்று. மனுஷரினின்று தள்ளப்படுவாய் என்ற வார்த்தை உண்டானது. அது உடனே நடைபெற்றது. வெளியின் மிருகங்களோடு மாடுகளைப் போல் புல்லை மேய்ந்தான்.
சவுல் கொன்றது ஆயிரம், தாவீது கொன்றது பதினாயிரம் என்று முறைமுறையாக பாடிய பாட்டைக் கேட்ட சவுல், தாவீதை வித்தியாசமாய் நோக்கிப் பார்க்க ஆரம்பித்தான். காய்மாகாரமாய் அவன் பார்த்தபடியால், தேவனால் விடப்பட்ட பொல்லாத ஆவி சவுலின்மேல் இறங்கிற்று. அவனது வாழ்க்கை இருள் நிறைந்ததாய் மாறியது. கண் கெட்டதாயி ருந்தால் உன் சரீரம் முழுவதும் இருளாயிருக்கும் என்ற வார்த்தையின்படி நம் சரீரம் முழுவதும் கெட்டதாய் மாறி இருளாய் மாறி விடுகிறது.
3. கர்த்தரின் வார்த்தையையும் ஆலோசனையையும் அசட்டை பண்ணும்போது இருண்ட வாழ்க்கை
"தேவனுடைய வார்த்தைகளுக்கு விரோதமாய்க் கலகம்பண்ணி, உன்னதமானவருடைய ஆலோசனையை அசட்டைபண்ணினவர்கள், அந்தகாரத்திலும் மரண இருளிலும் வைக்கப்பட்டிருந்து, ஒடுக்கத்திலும் இரும்பிலும் கட்டுண்டு கிடந்தார்கள்." சங்கீதம் 107:10, 11
இன்று அநேகர் கர்த்தருடைய வார்த்தையை ஏற்று கொள்வது கிடையாது. அதை ஆராய்வதற்கும், அறிவதற்கும் இடம் கொடுப்பது கிடையாது. தேவனுடைய வார்த்தைகளின் மேல் பிரியமாயிருந்து இரவும் பகலும் தியானிக்க வேண்டிய வாழ்க்கையை விட்டு விட்டு, தங்கள் காரியங்களில் தோல்வியும் துக்கமும் அடைகிறார்கள். இந்த ஆவியும் ஜீவனும் நிறைந்த வார்த்தைகள் ஆசீர்வாதத்தின் ஊற்றாய் இருக்கிறது. வலதுபுறமாய், இடதுபுறமாய் கர்த்தரின் வழியை விட்டு விலகும்போது, வழி இதுவே, இதிலே நடவுங்கள் என்று நடத்தும் வார்த்தையாயிருக்கிறது. இந்த வார்த்தைகளை அனுப்பித்தான் நம்மைக் குணமாக்குகிற தேவனாயிருக்கிறார். நாம் செய்ய எண்ணும் தவறான காரியங்களைக் குறித்து நம்மை எச்சரித்து நல்வழி நடத்தக்கூடிய நலமான வார்த்தைகள். வாழ்க்கையில் நம்பிக்கையை இழந்து இனி என்ன செய்வது, எவ்வாறு வாழ்வது என்று கலங்குகிற நேரத்தில், கலங்காது தேற்றக்கூடிய ஜீவ வார்த்தைகள். கொடூரமான வியாதிகள் நிறைந்து பெருகி இருக்கும் வேளையில், பொல்லாப்பு நேரிடாது, வாதை உன் கூடாரத்தை அணுகாது என்று உன்னைக் காக்கும்படியான நல்வார்த்தையைத் தந்து கர்த்தர் நம்மை நடத்துகிறவராயிருக்கிறார்.
இவ்விதமான ஆசீர்வாதத்தைத் தரக்கூடிய இந்த வார்த்தை களுக்கு இடம் கொடாது, இவை எல்லாம் எப்படி நடைபெறும் என்று எண்ணும்போதும், சிந்திக்கும்போதும், அதன்படியே தீமையான காரியங்கள் நேரிடும். நான் பயந்த காரியம் எனக்கு நேரிட்டது என்று யோபு தன் சுகத்தை இழந்து, செல்வத்தை இழந்து, தன் மனைவியின் அன்பையும் இழந்து வேதனை நிறைந்த நேரத்தில் கூறியதைப் பார்க்கிறோம்.
4. தேவனைத் துதியாதபோது இருதயம் இருளடைகிறது
"அவர்கள் தேவனை அறிந்தும், அவரைத் தேவனென்று மகிமைப் படுத்தாமலும், ஸ்தோத்திரியாமலுமிருந்து, தங்கள் சிந்தனைகளினாலே வீணரானார்கள்; உணர்வில்லாத அவர்களுடைய இருதயம் இருளடைந்தது." ரோமர் 1:21
தாயின் கருவில் உருவானதுமுதல் நம்மைப் பாதுகாத்து, இம்மட்டும் கிருபையினால் நடத்தி வருகிற அன்பின் தேவனை மறந்து, அவர் செய்த உபகாரங்களை நினையாதபடி வாழும்போது, இருள் நிறைந்து விடுகிறது. நாம் இந்தப் பூமியிலே எதற்காக சிருஷ்டிக்கப்பட்டிருக்கிறோம் என்றால் அவரைத் துதிப்பதற்குத்தான். 'இந்த ஜனத்தை எனக்கென்று ஏற்படுத்தினேன்; இவர்கள் என் துதியைச் சொல்லிவருவார்கள்.' என்ற ஏசாயா 43:21ன் படி, கர்த்தரைத் துதியாது, உலக மக்களைப்போல நேரத்தையும், நாளையும், இடத்தையும், மனிதர்களையும் புகழ்ந்து கொண்டிருக்கிறார்கள். இவ்வாறு தேவனைத் தவிர எதையெல்லாம் நல்லது என்று அதைப் புகழ்கிறார்களோ, அவர்களது வாழ்க்கையில் எளிதாக இருள் நிறைந்து கலங்குகிறார்கள். தேவனைத் துதித்து வெளிச்சத்தின் பிள்ளைகளாய் வாழ வேண்டியவர்கள், உலகத்தாரால் செய்யப்பட்டவைகளைப் புகழ்ந்து போற்றுகிறபடியால், பாடுகளும், துயரமும், துக்கமும் அடைகிறார்கள். கர்த்தராகிய இயேசு கிறிஸ்து எப்படிப்பட்டவர் என்றும், என்ன நன்மையான காரியங்களை என் வாழ்க்கையில் செய்திருக்கிறார் என்றும் நினையாதபடி, உலக மக்களைப் போல வீணான காரியங்களில் நம் தாலந்துகளை, நம் நேரங்களை செலவிடும்போது, இருளும் அழிவும் தோன்றிவிடுகிறது.
5) சகோதர அன்பில்லாதபடியால் இருள்
''ஒளியிலே இருக்கிறேன் என்று சொல்லியும் தன் சகோதரனைப் பகைக்கிறவன் இதுவரைக்கும் இருளிலே இருக்கிறான்."1 யோவான் 2:9
உன்னைப்போல் பிறனை நேசி என்ற கிறிஸ்துவின் உபதேசத்திற்கு இடம் கொடாது தன்னலம் நிறைந்த தவறான வாழ்க்கை வாழும் போது, நாம் இருளிலே இருக்கிறோம். இருளினால் இடருகிறோம். இருளினாலே எங்கே செல்கிறோம் என்று அறியாதபடி தவிக்கிறோம். இயேசு கிறிஸ்து நம்மை நேசித்து, தம்மை சிலுவையில் அறைந்த மனிதர்களுக்காக அவர் ஜீவன் எடுபடும் முன்பாக பிதாவின் சமுகத்தை நோக்கி மன்னிப்புக்காக மன்றாடியதை நாம் அறிவோம். இந்த அன்பான பண்பு இல்லாதபடியால் இருளானது நம்மைச் சூழ்ந்து கொள்கிறது.
II. வெளிச்சம் உண்டாக என்ன செய்ய வேண்டும்
1) கர்த்தரால் நடத்தப்பட ஒப்புக்கொடுக்க வேண்டும்
"குருடரை அவர்கள் அறியாத வழியிலே நடத்தி அவர்களுக்குத் தெரியாத பாதைகளில் அவர்களை அழைத்துக்கொண்டு வந்து, அவர்களுக்கு முன்பாக இருளை வெளிச்சமும், கோணலை செவ்வையுமாக்குவேன்; இந்தக் காரியங்களை நான் அவர்களுக்குச் செய்து, அவர்களைக் கைவிடாதிருப்பேன்'' ஏசாயா 42:16
கர்த்தராகிய இயேசு கிறிஸ்து நம்மை தம்முடைய ஆவியானவரைக் கொண்டு நித்தமும் நடத்துகிறார். அவர் நம்முடைய வாழ்க்கையிலே சின்ன காரியத்தில் இருந்து பெரிய காரியம் வரை நம்மை நடத்துகிறவராய் இருக்கிறார். அவரால் நடத்தப்படும்போது,நமக்கு ஒன்றும் குறைவில்லாது, நம்முடைய எலும்புகள் நிணமுள்ளதாய் மாறும். நம் வாழ்வு வற்றாத நீருற்றைப் போலாகும். எதைக்குறித்தும், எவைகளைக் குறித்தும் கலங்காதிருக்கத்தக்கதான நலமான மேலான நல்வாழ்வைத் தந்து ஆசீர்வதிக்கிறார். இன்று கர்த்தர் நம்மை நடத்துவதற்கு இடம் கொடுக்க வேண்டும். பயம் நிறைந்த சூழ்நிலையாய் இருக்கலாம். பாடுகள் நிறைந்த போராட்டம் மிகுதியான காலமாகவும் இருக்கலாம். ஆனால் அவர் நடத்துதலுக்கு இடம் கொடுக்கும் போது நம் குறைகள் நீங்கும். தோல்விகள் ஜெயமாகும். இருள் நீங்கி வெளிச்சமும் வெற்றியும் தோன்றும். பேதுரு கடலிலே மீன் பிடிக்கும்போது அன்று இரவிலே ஒரு மீனையும் பிடிக்கவில்லை. அவனது வாழ்வில் தோல்வி, துக்கம் சூழ்ந்திருந்தது. தன்னுடைய வலைகளைச் சுத்தம் பண்ணிக் கொண்டிருந்தான். இயேசு கிறிஸ்து அவன் படகில் ஏறி, தம்மிடம் வந்த மக்களுக்குப் போதனை செய்தார். பின்பு பேதுருவைப் பார்த்து படகை ஆழத்திலே தள்ளிக் கொண்டுபோய், உன் வலையைப் போடு என்றார். அப்படியே செய்தான். அவனது வாழ்வில் தோல்வி என்ற இருளின் செயல் அகன்றது. வெற்றி என்ற வெளிச்சம் வெ பிரகாசித்தது. அவர் நடத்துகிற விதமே நாம் வெளிச்சத்தின் பிள்ளைகளாய் மாற வேண்டும் என்பதே.
2) துதியினால் இருள் மாறும்
"நடுராத்திரியிலே பவுலும் சீலாவும் ஜெபம் பண்ணி, தேவனைத் துதித்துப் பாடினார்கள். காவலில் வைக்கப்பட்டவர்கள் அதைக் கேட்டுக்கொண்டிருந்தார்கள்."
"சடிதியிலே சிறைச்சாலையின் அஸ்திபாரங்கள் அசையும்படியாகப் பூமி மிகவும் அதிர்ந்தது; உடனே கதவுகளெல்லாம் திறவுண்டது: எல்லாருடைய சுட்டுகளும் சுழன்றுபோயிற்று.” அப்போஸ்தலர். 16:25,26
நடுராத்திரியிலே இருட்டின அறையில் சிறைச்சாலையில் அடைக்கப்பட்டிருந்த பவலும், சீலாவும் தேவனைத் துதித்துப் பாடினார்கள். அநேக அடிகளைப் பெற்றவர்களின் கையும், காலும் தொழுமரத்தில் கட்டப்பட்ட நிலைமை. வேதனை, பாடுகள் நிறைந்தநேரத்தில் தேவனைத் துதித்தார்கள். இன்று அநேகர் பிரச்சனை, பாடுகள் பெருகி, குறைவு, வேதனை, பெலவீனம் அடையும்போது, கர்த்தரைத்தேடினேன், துதித்தேன் எனக்கு என்ன பிரயோஜனம் என்று சொல்லிக்கொண்டுத் திரிகிறார்கள். ஆனால் பவுலும், சீலாவும் வேதனை, பாடுகள், போராட்டம் என்ன நடைபெறுமோ என்ற கசந்த நிலைகளில் கர்த்தரைத் துதிக்கத்தக்கதான உணர்வும், உள்ளமும் உடையவர்களாய் இருந்து துதித்தார்கள். சடிதியில் தேவனுடைய வல்லமை இறங்கியது. துதி சத்தத்தைக் கேட்ட அனைவரின் கட்டுகள் கழன்று போயிற்று. சிறைச்சாலையின் வாசல்கள் திறந்தன. துதியின் வல்லமை இருண்ட சிறைச்சாலையில் இருந்து அவர்களை விடுவித்து, அவர்கள் ஆறுதலடையவும், தேற்றப்படவும், காயங்கள் கட்டப்படவும், கர்த்தர் கிருபை புரிந்தார். துதியின் வல்லமையினால் இருள் நீங்க கர்த்தர் உதவினார்.
3) செம்மையானவர்களின் வாழ்வில் இருள் நீங்கி வெளிச்சம் உண்டாகும்.
"செம்மையானவர்களுக்கு இருளிலே வெளிச்சம் உதிக்கும்; அவன் இரக்கமும், மன உருக்கமும் நீதியுமுள்ளவன்." சங்கீதம் 112:4
இன்று நம்முடைய வாழ்க்கையில் நாம் எதைச் செய்தாலும் செம்மையாய்ச் செய்வதற்கு இடம் கொடுக்க வேண்டும். செம்மையான இருதயம் உடையவர்களைத் தேவன் நேசிக்கிறார். கர்த்தர் சத்தத்தைக் கவனமாய் கேட்டு, அவரின் பார்வைக்குச் செம்மையானதைச் செய்யும் போது, எகிப்திற்கு வந்த எந்த வியாதியையும் வரப்பண்ணேன் என்று சொல்லியிருக்கிறார். தாவீது தேவனுடைய பார்வைக்குச் செம்மை யானதைச் செய்தபடியால், மரண இருளின் பள்ளத்தாக்கிலே நடந்தாலும் அவனைக் காத்து மேன்மையான நிலைக்கு உயர்த்தினார். யாரெல்லாம் கர்த்தரின் பார்வைக்குச் செம்மையானதைச் செய்தார்களோ, கர்த்தர் அவர்களை ஆசீர்வதித்தார். செம்மையான இருதயமுடையவர்களைத் தேவன் பாதுகாக்கிறார். செம்மையானவர்களின் கூடாரமோ செழிக்கும். இன்று நாம் கர்த்தராகிய இயேசு கிறிஸ்துவை முன்னதாக வைக்கும்போது நமக்கு முன்னே சென்று, நம் வழிகளைச் செவ்வையாக்குவார். இவ்விதமாய் நம் வாழ்க்கை செம்மையாய் மாறும் போது இருளிலே வெளிச்சம் உதிக்கும்.
4) சவுலை இருளின் வாழ்விலிருந்து மாற்றியது கர்த்தரின் வெளிச்சம்
"அவன் பிரயாணமாய்ப் போய், தமஸ்குவுக்குச் சமீபித்தபோது, சடிதியிலே வானத்திலிருந்து ஒரு ஒளி அவனைச் சுற்றிப்பிரகாசித்தது." "அவன் தரையிலே விழுந்தான். அப்பொழுது: சவுலே, சவுலே, நீ என்னை ஏன் துன்பப்டுத்துகிறாய் என்று தன்னுடனே சொல்லுகிற ஒரு சத்தத்தைக் கேட்டான்." அப்போஸ்தலர் 9:3,4
சவுல் கர்த்தராகிய இயேசு கிறிஸ்துவை அறியாத ஒரு பாரம்பரிய வாழ்க்கை வாழ்ந்து கொண்டிருந்தவன். இயேசு கிறிஸ்துவை ஆண்டவராக ஏற்றுக்கொண்டவர்களை, சபைகளைத் துன்பப்படுத்த அதிகாரம் பெற்று தமஸ்குவுக்கு வந்தான். அந்த நாட்டை நெருங்குகிற வேளையில் கர்த்தருடைய வெளிச்சம் அவன் மேல் வீசியது. உடனே அவன் தரையிலே விழுந்தான். அப்பொழுது, சவுலே, சவுலே, நீ என்னை ஏன் துன்பப்படுத்துகிறாய் என்ற சத்தத்தைக் கேட்டான். அதற்கு ஆண்டவரே, நீர் யார் என்று கேட்டான். நீ துன்பப்படுத்துகிற இயேசு நானே என்றார். உடனே தன்னைக் கிறிஸ்துவுக்கு ஒப்புக்கொடுத்தான். அவருடைய வழிநடத்துதலுக்குத் தன்னை அர்ப்பணித்து, கர்த்தருடைய நாமத்தை அநேகருக்கு, அநேக நாடுகளில், புறஜாதிகளுக்கு அறிவித்தான். அநேக சபைகளை எழுப்பினான்.
இன்று நம்முடைய வாழ்க்கையை கர்த்தரால் நடத்தப்படுவதற்கும், துதியினால் நிறைந்து செம்மையானவைகளைச் செய்வதற்கும் நம் வழிகளைச் சீர்ப்படுத்திக் கொள்ளும் போது, அவரின் வெளிச்சம் நம்மை இருளிலிருந்து வெளிப்பட செய்யும். அத்துடன் பெரிய வெளிச்சம் நம் மீது வீசும் போது, அவரின் நடத்துதலுக்கு நம்மை அர்ப்பணிக்கும்போது, நம்முடைய இருண்ட வாழ்க்கையை ஒளிமயமாக மாற்றுவார். அநேகரை வெளிச்சத்துக்குள் நடத்துகிற கர்த்தரின் கரத்தில் பிரகாசிக்கிற ஒளியாவோம்.
கர்த்தர் நம்மை ஆசீர்வதிப்பாராக.
கிறிஸ்துவின் பணியில்,
சகோ. C. எபனேசர் பால்.
